Santiagotarrak elkarteak antolatutako ibaiaren jaitsierarekin bat egingo du musika eta mendia uztartzen dituen ekimenak
Urmugaren Urtanta lau tokitatik abiatu da ostiral honetan: Biriatu, Bera, Endarlatsa eta Urruña. Uztailaren 24ra bitartean, Euskal Herriko zazpi lurraldeak josiko ditu ekimenak, musikarekin euskal mendiak zeharkatuz.
Lehen jardunaldiaren ondoren, larunbat honetan Bidasoan zehar ibiliko da. Izan ere, edizio honetako leitmotiv nagusietako bat migrazioa izango baita. Biriatuko Ontxista piknik gunean, 18.00etan, omenaldia egingo zaie muga ibaitik zeharkatu nahian hiltzen diren pertsona guztiei. Amets Arzallus bertsolaria buru izango duen omenaldi musikalak bat egingo du Irungo Santiagotarrak Kirol Elkarteak antolatzen duen ibaiaren jaitsierarekin, gainera, Albaolako Patatxeak ere parte hartuko du.
Ondoren, Santiagotarrak elkartearen egoitzara joango da Urmuga, eta bertan errezitaldia eskainiko dute Mugarri taldeak, Otxo taldeak, Jokin Lasak, Garaldeko Rogelio Botanz & Percuterasek eta Et Incarnatus Orkestrak.
Igandean Oiartzun, Lesaka eta Aritxulegitik Errenga mendira bidean jarraituko duten zazpi euskal lurraldeetako ibilbideak abiatui aurretik, Urmugak hainbat zeharkaldi eta kontzertu eskaini zituen joan den maiatzean Kanariar Uharteetan, gure Euskal Herria migrazioari lotutako errealitate sozial latza bizi duen beste gune batekin lotu asmoz. Horrenbestez, Contramapas hezkuntza ekimenarekin lankidetzan, itxaropez beteriko irudia eskaini nahi da erakundetik, Afrika eta Europa besarkatuta, elkartasun eta harrera mezua aldarrikatuz.
